Padayong gipahimangnuan sa Pangagamhanang Probinsyal sa Bukidnon, pinaagi sa Provincial Veterinary Office (PVet), ang publiko nga hugot nga ginadili ang pagpasulod sa tanang klase sa baboy ug mga produkto niini sa probinsya ilabinang nagkaduol ang holiday season.
Ang implementasyon subay sa Provincial Ordinance No. 2021-62R (26th SP) o ang “Ordinance for the Prevention, Mitigation, and Eradication of African Swine Fever in the Province of Bukidnon.”
Si Dr. Kharinine Escasinas, Provincial Director sa PVet-Bukidnon, nagpasabot nga padayon ang istrikto nga pagbantay sa mga border checkpoint sa probinsya. Ilawom sa hugot nga pagpatuman sa balaod, ginadili ang pagpasulod sa: karne sa baboy, processed meat products, lechon, ug buhi nga baboy kung asa kadtong masapon unang aksyon sa ilang field personnel mao ang direktang pagpahunong ug pagpabalik sa mga ginadiling produkto sa gigikanan niini.
Gidugang pa niya nga ang maong lakang kabahin sa biosecurity measures aron mapugngan ang pagsulod ug pagkaylap sa African Swine Fever (ASF) ug aron maprotektahan ang swine industry sa Bukidnon. Gipahimangnuan usab ang publiko nga dili angay pakaonon ang baboy og lamaw o kitchen waste, tungod kay posible kini mahimong tinubdan sa ASF transmission.
Samtang giingon ni Dr. Escasinas nga tungod sa nagpadayong hulga sa ASF, mas gipahugtan pa sa Provincial Veterinary Sanitation Checkpoints (PVSC) ang inspeksyon ug pag-confiscate sa mga baboy, pork products, ug uban pang livestock & poultry items nga walay kompleto nga shipment documents aron malikayan ang pagkatag sa maong sakit sa baboy
via: LGU BUKIDNON
