Gisiguro ni President Ferdinand Bongbong Marcos Jr. nga siya mismo ang motapos sa isyu sa pagpanubag sa mga nalambigit sa anomaliyang flood control projects nga iyang gisugdan og imbestigasyon.
Sa iyang pahayag, giingon sa Pangulo nga walay espesyal nga pagtrato sa mga opisyal ug indibidwal nga giisyuhan na og warrant of arrest sa Office of the Ombudsman.
Niadtong Biyernes, gipahibalo ni Marcos nga si kanhi Congressman Zaldy Co ug 17 pa ka opisyal gikan sa Department of Public Works and Highways (DPWH) ug Sunwest Corporation ang giisyuhan na og warrant of arrest.
Matod sa Pangulo, magpadayon ang gobyerno sa walay hunong nga imbestigasyon ug pagpasaka og kaso batok sa mga nalambigit, base sa klaro ug lig-on nga ebidensiya.
Nagpasalamat usab siya sa publiko sa ilang pasensya ug pagsalig sa proseso, nga karon matod pa naghatag na og konkretong resulta.
Gipunting sa Presidente nga ang gipagawas nga warrant of arrest dili binuhat o istorya-istorya lang, kondili nag-agad kini sa tinood ug dokumentadong ebidensiya nga nakuha sa imbestigasyon.
Photo Courtesy to: PNA
