Angol ang usa ka Senior Citizen human kini giluba ug gitigbas sa iyang silingan sa Barangay Ariosa, Molave, Zamboanga del Sur, kagabii pasado alas 6:30 ang takna Nobyembre 21, 2025.
Wala na pangalani sa PNP Molave ang biktima nga 66 anyos, mag-uuma, samtang ang suspetsado nga silingan usa ka 34-anyos usa ka mag-uuma nga managsamang residente sa lugar.
Sa nakuhang report sa mga kapulisan sa Molave Municipal Police Station ang biktima padulong unta manugway sa iyang kabayo sa bukirang bahin apan giatangan sa suspetsado ug didto na gihimo ang pagpanigbas.
Saysay sa biktima nga naglayog pa sila sa suspetsado aron mailog ang sundang hinungdan nga nahulog kini ngadto sa sagbutan apan aduna pay kutsilyo ang suspetsado hinungdan nga nakahimo pa kini sa pagluba ang suspetsado ngadto sa biktima hinungdan nga nakaangkon ug samad nilubaan sa kamot lakip na sa lawas ang biktima.
Human sa maong panghitabo ang biktima daling gidala sa Blancia Hospital alang sa medical nga atensyon og anaa na kini karon sa luwas nga kahimtang.
Samtang ang suspetsado dali kining miikyas padulong sa Sitio Bag-ong Sugbo, Barangay Silangit, Molave Zamboanga del Sur ug nakuha sa crime scene ang kutsilyo nga adunay gitas-on sa 16.5 inches.
Sa karon naglusad na ug hot pursuit operation ang mga kapulisan sa lungsod sa Molave para masikop ang miikyas nga suspetsado.
Photo courtesy to: ZSPPO
