Nagpadayon sa pagpanghimakak sa iyang kalambigitan si kanhi House Speaker ug karon representante sa Leyte nga si Martin Romualdez sa giingong mga anomaliya sa daghang mga proyekto sa Flood Control Project nga giimbestigahan karon sa Independent Commission for Infrastructure (ICI).
Sa usa ka interbyu, si Romualdez miingon nga wala siya nabalaka nga mahisgotan ang iyang ngalan sa imbestigasyon tungod kay, matod niya, wala siyay gilapas nga balaod ug abli sa bisan unsang proseso nga nagtumong sa pagklaro sa isyu. Gipasalig niya nga boluntaryo siyang mitungha sa mga imbestigador ug gitubag ang tanan nilang mga pangutana.
Dugang niya nga importante alang kaniya nga masulbad ang isyu aron ang mga proyekto alang sa mga komunidad nga nanginahanglan og proteksyon batok sa pagbaha dili maapektuhan.
Sumala sa iyang abogado, si Atty. Ade Fajardo, si Romualdez nagpabilin nga aktibo sa pagtuman sa iyang mga katungdanan isip representante sa Leyte samtang nagpadayon ang imbestigasyon. Miingon siya nga dili niya tugotan nga ang mga alegasyon makaapekto sa trabaho sa magbabalaod.
Samtang, gilauman sa kampo ni Romualdez nga ang imbestigasyon sa ICI ug sa Office of the Ombudsman mahimong patas, lawom, ug komprehensibo aron ipakita ang tibuok hulagway sa kontrobersiya.
via: VERA FILES
