Labing menos 51 ka tawo ang namatay ug siyam ang missing human sa mga adlaw nga walay hunong nga pag-ulan nga hinungdan sa kaylap nga pagbaha sa sentral Vietnam.
Sumala sa lokal nga mga awtoridad, ang grabeng pagbaha miigo sa daghang mga probinsya, nga miresulta sa pagkabanlas sa kapin sa 52,000 ka mga balay. Daghang mga residente ang napugos sa pagbakwit ngadto sa mga evacuation center samtang ang tubig-baha nagpadayon sa pagsaka.
Kapin sa 500,000 ka mga balay ug mga establisemento ang nawad-an usab og kuryente, nga naghimo sa mga relief operation ug komunikasyon sa mga apektadong lugar nga mas mahagiton.
Gikan sa Enero hangtod Oktubre karong tuiga, ang kinatibuk-ang kadaot nga natala sa Vietnam miabot sa kapin sa $2 bilyon tungod sa sunod-sunod nga kusog nga mga bagyo ug baha nga miigo sa nasud. Naglakip kini sa kadaot sa agrikultura, imprastraktura, transportasyon, ug panginabuhi sa mga residente.
Nagpadayon ang mga operasyon sa pagpangita ug pagluwas, samtang ang mga disaster response team nag-andam alang sa posible nga dugang nga mga ulan nga mahimong mograbe ang sitwasyon. Nagpasidaan usab ang mga awtoridad sa hulga sa pagdahili sa yuta, labi na sa mga lugar sa bukid.
via: THE GUARDIAN
