Pasado na sa House Committee on Overseas Workers Affairs ang usa ka sugyot balaodnon nga nagtinguha sa pagtukod og Balikbayani Center nga mahimong one-stop shop alang sa mga OFW ug sa ilang pamilya. Ang maong House Bill 50, gisang-at ni Rep. Adrian Salceda.
Sumala sa magbabalaod, tumong sa maong sugyot nga maprotektahan ug mapasidunggan ang dignidad sa mga OFW pinaagi sa paghatag kanila og hapsay, tukma, ug kompleto nga serbisyo.
Kon mahimong balaod, tukoron ang mga Balikbayani Centers sa nagkalain-laing rehiyon sa tibuok nasod, lakip na ang mga dagkong airports sama sa NAIA, Mactan–Cebu International Airport, ug Davao International Airport.
Sa maong one-stop shop, dali na makabenepisyo ang OFWs sa mga serbisyo sa nag-unang ahensya sa gobyerno sama sa OWWA, DMW, DSWD, DOLE, TESDA, DTI, ug DOH.
Mandato sa Balikbayani Center ang paghatag og ayuda, hustong training, ug medikal ug psychosocial nga serbisyo alang sa tanang OFW ug ilang pamilya.
Photo courtesy: Philstar
