Walay pagtaas sa presyo sa mga nag-unang palaliton sa Iligan, sumala sa report sa Local Price Coordinating Council (LPCC) nga gihimo sa niaging Nobyembre 19, 2025. Kini subay sa deklarasyon nga price freeze human ipailawom sa state of calamity ang nasud.
Sumala ni Marie Ann Beley, City Agriculturist sa Iligan , nga naghimo sila og price monitoring matag Lunes, Miyerkules, ug Biyernes sa mga merkado sa siyudad. Gi-monitor usab sa ilang opisina ang presyo sa perishable agricultural crops.
Lakip usab sa gimonitor sa LPCC ang presyo sa mga tambal sa pharmacies ug ang presyo sa basic necessities sa mga supermarkets, stores, ug groceries.
Sumala ni John Clifford M. Fernan, Division Chief sa Consumer Protection Division sa DTI, ila usab gi-susi ang presyo sa basic necessities kung nagsunod ba kini sa suggested retail price nga gihatag sa central office.
Gipahibalo ni Fernan nga isyuhan nila og letter of inquiry ang mga tindahan nga nagpataas sa presyo aron mapahibalo ang rason sa pagtaas niini ug masiguro ang proteksyon sa konsumidor.
Photo courtesy to: City Information Office
