Nagpahigayon ang gobyerno sa Syria og halapad nga pre-emptive operations batok sa mga grupo nga konektado sa Islamic State (IS) aron mapugngan ang posibleng kalihokan ug hulga sa terorismo sa nasud.
Kini ang gipahibalo sa tigpamaba sa Interior Ministry niadtong Sabado, base sa report sa state-run Al Ekhbariya TV.
Sa maong operasyon, 61 ka raid ang gihimo sa nagkadaiyang dapit sa Syria nga mitultol sa pagdakop sa 71 ka indibidwal og pagkasakmit sa daghang eksplosibo ug mga armas. Gilauman nga kini usa ka lakang aron palig-onon ang seguridad sa nasud ug mapugngan ang mga pag-atake nga posibleng ipahigayon sa mga militante.
Ang kalihokan nahimong hinungdan usab sa biyahe ni Syrian President Ahmed al-Sharaa padulong sa Washington, diin siya makigkita kang US President Donald Trump ug moapil sa US-led anti-Islamic State coalition nga nagtinguha sa kalinaw ug kooperasyon batok terorismo.
Wala pa mitubag ang US Department of State, ug Pentagon sa mga hangyo alang sa komento kalabot sa isyu. Padayon gihapon ang pagpahinumdom sa mga lumulupyo sa Syria nga magpabiling mabinantayon ug mosuporta sa kalihokan sa seguridad sa nasud.
Photo Courtesy to:Reuters
