Nakita sa barkong Briton ang barkong Mary Celeste niadtong Disyembre 4, 1872, nga naglutaw sa dagat sa Atlantic Ocean nga walay klarong direksyon. Sa pagpanubay ug pagbalhin ug sakay sa mga Britanya sa maong barko, ilang nasayran nga hapsay ug kompleto pa ang tanan, gawas lamang nga nangawala ang tanang tripulante niini.
Wala gayud matod pa kini timailhan nga giatake og pirata, ug bisan ang mga pagkaon nagpabiling anaa pa sa lamesa. Nakita usab sa captain’s log book nga kalit nahuman ang byahe niini pipila na ka adlaw ang nilabay, ug walay timailhan nga naglisod kini o kung giagian man kini ug bagyo. Dugang pa sa taho, ang lifeboat lamang ang wala, apan hangtod karon, wala gayud nakit-an ang mga sakay niini.
Daghan sa mga teorya ang mitungha nga posibleng hinungdan sa maong katingalahang panghitabo mao ang pagrebelde sa mga sakay o tripulante niini ngadto kapitan, pagsukol sa mga pirata, linog ilawom sa dagat, o dili ba kaha ang pagsimhot sa asido o alkohol nga singaw sa kargamento sa barko. Apan wala gayud bisan usa niini ang napamatud-an.
Hangtod sa kasamtangan, ang pagkawala sa tripulante sa Mary Celeste nagpabilin nga usa ka labing dakong misteryo sa kasaysayan sa byahe sa kadagatan.
Photo Courtesy to:Youtube
