Nasikop sa mga sakop sa Tagum City Police Station ang usa ka lalaki nga giingong nanag-iya og armas ug bala nga walay igong papeles, atol sa gihimong entrapment operation alas-12:30 sa kadlawon, Nobyembre 9, 2025, sa Purok Palmera, Barangay Visayan Village, Tagum City, Davao del Norte.
Giila ang suspek nga si alyas Gerald, 25 anyos, usa ka laborer ug residente sa nahisgutang barangay. Sa operasyon nga gipangunahan sa Mobile Patrol-5, Tagum City, nakumpiska gikan sa suspetsado ang usa ka improvised firearm nga may usa ka buhing bala ug laing napulo ug usa (11) pa ka buhing bala sa kalibre 5.56.
Gihimo ang maong operasyon ubos sa pagdumala sa Davao Norte Police Provincial Office (DNPPO) nga gipangulohan ni PCOL Glenn G. Cristines, ug nasubay kini sa Supreme Court pinaagi sa paggamit sa Alternative Recording Device alang sa saktong dokumentasyon. Gibasahan gilayon ang suspek sa iyang katungod ubos sa Miranda Doctrine ug karon anaa na kini sa kustodiya sa Tagum PNP Custodial facility alang sa tukmang lakang.
Gidayeg ni PCol. Cristines ang mga operatiba sa ilang kusog ug paspas nga aksyon batok sa paglapas sa Republic Act 10591 kon Comprehensive Firearms and Ammunition Regulation Act ug sila matud pa magpadayon sa pagpatigayon sa maong balaodnon.
Photo Courtesy to:Tagum City Police Station
