Giplano sa Department of Agriculture (DA) ang pagkuha og third-party auditors aron susihon ang posibleng anomalya sa mga farm-to-market road projects sa tibuok nasud, sumala ni Secretary Francisco Tiu Laurel.
Gipahibalo niya nga ang tabang sa gawas nga eksperto kinahanglan tungod sa kadaghan sa proyekto—hapit 2,500 ka proyekto nga nagkantidad og PHP30 bilyon. Apil usab ang Army engineers sa pag-verify sa status sa mga proyekto.
Gisugyot usab ni Tiu Laurel nga magpagawas ang DA og “price menu” nga nagtakda sa lain-laing presyo depende sa kalisod sa proyekto, aron malikayan ang flat-rate system nga karon giisip nga depektibo. Pananglitan, ang usa ka kilometro sa dalan sa patag mahimong PHP10 milyon, samtang sa bukirang lugar nga adunay 10% slope ug drainage requirements, mahimong PHP15 milyon hangtod PHP18 milyon.
Giplano usab ang pagdani sa mas daghang contractors, lakip ang mga international firms, aron paspasan ang pagtukod sa mga dalan. Giingon ni Tiu Laurel nga mas dako ang benepisyo sa mga mag-uuma kung mapadali ang irrigation ug road connectivity.
Sa miaging miting, nakigsabot ang DA sa Department of Public Works and Highways (DPWH) aron hisgutan ang mga irregularidad sa pipila ka proyekto, lakip sa Davao Occidental ug Zamboanga City. Ang DA ug DPWH magtambong usab sa Independent Commission for Infrastructure aron i-refer ang ilang mga nadiskobrehan para sa dugang imbestigasyon.
SOURCE: ABS CBN NETWORK
Photo Courtesy to:PNA
