Andam na ang mga atleta sa Philippine Athletics Track and Field Association (PATAFA) ug Association of Boxing Alliances in the Philippines (ABAP) alang sa 33rd Southeast Asian (SEA) Games nga ipahigayon sa Thailand karong Disyembre 9 hangtod 20.
Matod sa PATAFA Secretary-General Jasper Tanhueco, mokompleto sila og 60 ka atleta, lakip si EJ Obiena, aron malabwan ang 22 ka medalya nga ilang nakuha sa Cambodia niadtong 2023. Ang mga atleta nagapadayon sa ilang training camp sa New Clark City isip preparasyon sa kompetisyon.
Giingon ni Tanhueco nga ilang tuyo nga mapauswag ang performance sa miaging SEA Games ug mapakita ang maayong pagrepresenta sa nasud.
Sa laing bahin, giila ni Marcus Manalo sa ABAP nga lisod ang ilang pag-atubang sa Thailand, nga usa sa mga powerhouse sa boxing sa rehiyon. Mokarga ang Pilipinas og 11 ka boksingero, lakip ang mga nakadaog og ginto sa Cambodia nga sila Carlo Paalam, Ian Clark Bautista, Paul Julyfer Bascon ug Nesthy Petecio. Giingon ni Manalo nga lisod maulit ang ilang performance tungod sa lig-on nga kompetisyon ug lahi nga kondisyon sa Thailand.
Matod usab ni Philippine Olympic Committee (POC) President Abraham “Bambol” Tolentino, buot niyang mapadayon sa Pilipinas ang ikalima nga puwesto sa medal tally bisan pa sa pagtangtang sa pipila ka events diin daghan unta og potensyal nga ginto ang nasud.
Sa 2023 SEA Games, nakakuha ang Pilipinas og 58 ka ginto, 85 ka pilak ug 117 ka bronze medals. Karon, kapin sa 1,600 ka atleta ang ipadala isip Philippine delegation sa biennial nga torneo sa Thailand.
SOURCE: ABS CBN NETWORK
