Ipatuman sa Department of Public Works and Highways kon (DPWH) ang pre-audit sa mga proyekto sa karsada aron masuta kung kinahanglan ba gyud ayohon ang usa ka dalan o dili.
Atol sa pag-review sa proposed budget sa DPWH alang sa 2026, si Secretary Vince Dizon miingon nga gawas sa kasamtangang post-audit, ipahigayon usab ang pre-audit aron malikayan ang pagdoble sa pondo o proyekto, labi na kung parehas ang lokasyon, katuyoan, o scope sa trabaho.
Si Senador Erwin Tulfo mitumbok nga ang balik-balik nga pagguba sa mga karsada bisan bag-o pa lang nahuman ang proyekto maoy hinungdan sa pagdoble sa gasto. Giingon niyang komon kini nga sitwasyon sa Rehiyon 5 sa Bicol, partikular na sa highway gikan Quezon hangtod Camarines Sur, diin kanunay gub-on ang dalan.
Gipasabot ni Dizon nga dugay na kining reklamo bahin sa reblocking, busa niadtong Oktubre 7, nagpagawas siya og memorandum nga mohunong sa tanang reblocking activities sa tibuok nasod hangtod nga makumpleto ang klarong guidelines ug criteria kung kanus-a kini angay buhaton.
Matod niya nga posibleng sa umaabot nga mga semana makumpleto na ang maong guidelines. Sa laing bahin, masaligon si Senador Tulfo sa bag-ong plano sa departamento, kay matod pa niya, nahimong “common practice” sa miaging administrasyon ang pag-ayo sa mga karsada bisan maayo pa ang kahimtang niini.
Photo Courtesy to:Police file tonite
