Gipaniguro sa e-wallet firm nga GCash nga walay nakitang paglapas o compromise sa ilang sistema ang mga forensic expert. Matod sa kompanya, ang giingong data nga nagkatag online walay katugma sa opisyal nga impormasyon sa mga user sa GCash.
Kini human gikumpirma sa GCash nga nasayod sila bahin sa usa ka online post nga nag-ingon nga gibaligya matod pa ang impormasyon sa mga user sa dark web. Gipamugos sa kompanya nga ang kaluwasan ug seguridad sa ilang mga user nagpabilin nga ilang nag-unang prayoridad.
Ang pahayag tubag sa mikatap nga online post nga nag-ingon nga dunay nahitabo nga data leak nga naglambigit sa GCash. Sumala sa post sa usa ka dark web forum, usa ka user ang nagtanyag og data records gikan 2019 hangtod Oktubre 2025, lakip ang eKYC (Know Your Customer) information, konektado nga bank accounts, ug mga GCash numbers.
Base sa listahan, giingong apil sa dataset ang mga merchant ug basic users nga adunay personal nga detalye sama sa ngalan, adres, trabaho, ug balido nga mga Philippine ID. Gibana-bana nga moabot sa 7–8 ka milyon nga user accounts ang anaa sa dataset, nga gibaligya sa kantidad nga hangtod $25,000, ug gidawat lang ang bayad pinaagi sa Monero (XMR) cryptocurrency.
Agig tubag sa mga alegasyon, diha-diha dayon nga nagsugod og imbestigasyon ang GCash, kauban ang ilang mga cybersecurity expert ug mga awtoridad, aron masuta ug pamatud-an nga walay kamatuoran ang mga sumbong.
Base sa pasiuna nga resulta sa imbestigasyon, ang giingong dataset sa online post dili match sa data structure nga gigamit sa GCash. Nadiskubrehan usab sa kompanya nga ang ubang mga ngalan sa listahan dili rehistrado nga mga user sa GCash, ug daghang entry ang kulang, gubot, o sayop ang impormasyon.
Gipasiugda pa sa GCash nga walay bisan unsang ebidensya sa data breach sa ilang sistema, ug nagpabilin nga luwas ang tanang account ug pondo sa ilang mga kustomer.
Photo courtesy: Gcash
