Gipaningkamotan karon ni Iligan City Lone District Congressman Celso Regencia nga mapalapdan ang akses sa edukasyon pinaagi sa duha ka sugyot balaodnon nga gitutokan aron mahatagan sa managsamang kahigayunan ang mga estudyante bisan pa sa pinakasuok nga mga dapit sa nasud.
Sa eksklusibong pakighinabi sa Juander Radyo News Team , gibutyag ni Volunteer Program Coordinator Ian Loking -nga usa si Congressman Regencia sa mga principal author sa landmark education reform measures.
Matod pa nga tinguha sa gihingusgang balaodnon ang pagpalig-on sa adbokasiya sa patas ug inklusibong edukasyon.
Ang Last Mile Schools Act (HB 4745) naglatid sa pagtukod ug pagpangusog sa mga eskwelahan sa mga Geographically Isolated, Disadvantaged, and Conflict-Affected Areas (GIDCA), lakip na ang mga hinterlands sa Iligan, aron masiguro nga ang mga bata sa lagyo nga lugar makadawat gihapon og kalidad nga edukasyon.
Samtang, ang Private Basic Education Voucher Assistance Act (HB 4744) naglatid sa paghatag og pinansyal nga tabang alang sa mga estudyante nga nag-eskwela sa mga pribadong tunghaan, ilabi na sa mga lugar nga kulang og public schools.
Ang nahisgutang mga House Bill nakalusot na sa ikatulo nga pagbasa sa House of Representatives, kung asa usa ka dako nga lakang padulong sa mas inklusibo ug patas nga sistema sa edukasyon sa tibuok nasud.
Nunot niini padayon ang paningkamot ni Congressman Regencia ug sa iyang mga kauban sa Kongreso nga walay usa ka bata ang mabiyaan tungod lamang sa kakulang sa oportunidad sa pag-eskwela.
