Tan-awon usab sa Blue Ribbon Committee ang isyu kalabot sa mga anomalya sa farm-to-market roads ug uban pang guba nga infrastructure projects sa sunod nga pagdungog niini, gawas sa mga anomaloso nga flood control projects.
Kini ang gikompirmar ni Senate President Vicente Sotto III, kinsa niingon nga dili mabalda ang imbestigasyon ug padayon ang pag-imbestigar niini sa komite.
Matod ni Sotto, uyon si Senate President Pro Tempore Ping Lacson nga ablihan ang imbestigasyon sa farm-to-market roads sa Department of Public Works and Highways (DPWH).
Nagtuo usab si Sotto, nga tungod sa kadako sa mga kahiwian sa ghost projects, palapdan sa Blue Ribbon Committee ang sakup sa imbestigasyon aron usab susihon ang ubang substandard o ghost projects sa mga ahensya sama sa Department of Agriculture, Department of Education, Department of Health, ug bisan ang PhilHealth.
Sa pagkakaron, wala pay gitakdang eskedyul sa sunod nga pagdungog sa Blue Ribbon Committee, apan ang komitiba magtagbo sunod semana o unang semana sa Nobyembre.
Photo courtesy to:Manila standard
