Gipasabot ni President Ferdinand “Bongbong” Marcos Jr. nga tuldukan na ug tapuson sa iyang administrasyon ang palakasan system sa pagpahigayon sa mga farm-to-market road (FMR) projects sa nasud.
Kini nga pahayag gibuhian sa Presidente, taliwala sa nagpadayong imbestigasyon sa gibanabana nga P105 milyon nga “ghost projects” nga FMR sa Mindanao.
Matod ni Marcos Jr., gikan karon, ang tanang FMR projects kinahanglan masubay na sa usa ka national master plan, ug dili na ipailawom sa impluwensya sa mga politiko o mga alyado sa partido.
Gipasabot usab niya nga gikonsulta na sa administrasyon ang mga gobernador ug mga alkalde aron ma-validate ang mga proyekto ug masiguro nga kini tinuod nga nagatubag sa panginahanglan sa mga mag-uuma, dili tungod lamang sa political patronage.
Ang maong lakang, matod sa Pangulo, kabahin sa tumong sa iyang administrasyon nga mas mapatuman ang tinud-anay ug limpyo nga pagpanghatag og serbisyo publiko, ilabina sa sektor sa agrikultura.
Photo courtesy: PIA
