Gipahinumdoman sa Land Transportation Franchising and Regulatory Board (LTFRB) ang tanang mga operator ug drayber sa pampublikong sakyanan nga kinahanglang tumanon ang 20 porsiyentong diskwento sa pletehan alang sa mga estudyante, senior citizen, ug persons with disabilities (PWDs) ilabi na sa pag-abot sa panahon sa Undas.
Gipasidaan ni LTFRB Acting Chairman Atty. Greg G. Pua Jr. nga ang kinsamang mapakyas sa paghatag sa maong diskwento mag-atubang og bug-at nga silot, lakip na ang posibleng pagsuspinde o pagkansela sa ilang Certificate of Public Convenience (CPC). Aron matubag ang pagdaghan sa mga pasahero nga mobiyahe sa mga lalawigan, nagpagawas usab ang ahensya og special permits alang sa kapin usa ka libo nga provincial buses sa tibuok nasod.
Giawhag sa LTFRB ang publiko nga i-report dayon ang bisan kinsang drayber o operator nga maningil og sobra o modumili sa paghatag og diskwento pinaagi sa ilang hotline 1342 o sa ilang opisyal nga social media channels, aron masiguro ang patas nga pagserbisyo ug mapanalipdan ang katungod sa mga kwalipikadong pasahero.
Photo courtesy: LTFRB
