Sugod sa Oktubre 30, ang mga aktibong miyembro sa Social Security System (SSS) nga adunay “monthly salary credit” nga dili molapas sa P10,000 mahimo na usab nga makadawat og tabang ubos sa programang Unified Package for Livelihood, Industry, Food and Transport (UPLIFT).
Matod ni DSWD Assistant Secretary ug tigpamaba nga si Irene Dumlao, ang mga kwalipikadong benepisyaryo makadawat og P8,000 nga tabang pinansyal, nga i-kredito ngadto sa ilang mga disbursement account.
Gipasabot ni Dumlao nga ang programa kaniadto naglangkob lamang sa mga miyembro sa SSS nga adunay “monthly salary credit” nga moabot hangtod sa P20,000; apan, gipalapdan kini aron matabangan ang mas daghang mamumuo nga ubos ang kita.
Ang programang UPLIFT gilunsad aron maminusan ang epekto sa sunod-sunod nga pagsaka sa presyo sa lana, nga resulta sa tensyon tali sa Estados Unidos ug Iran.
Niadtong Oktubre 23 ug 24, ang “Group 3″—nga gilangkuban sa mga miyembro sa SSS nga adunay “monthly salary credit” nga moabot hangtod sa P20,000—nakadawat sa ikaduhang hugna sa ilang tabang pinansyal.
Samtang, ang ikatulo ug ikaupat nga hugna, nga mokabat sa P4,000 alang sa “Group 2” (kadtong giklasipikar nga “near-poor” o hapit na mahisakop sa kategorya sa kabos), i-kredito ngadto sa ilang mga electronic wallet sugod sa Nobyembre 6.
Gitambagan ni Dumlao ang mga benepisyaryo nga wala pay e-wallet nga maghulat og pahibalo gikan sa ilang tagsa-tagsa ka lokal nga gobyerno mahitungod sa iskedyul sa manwal nga pagpanghatag sa tabang.
𝐏𝐡𝐨𝐭𝐨 𝐂𝐨𝐮𝐫𝐭𝐞𝐬𝐲: 𝐏𝐍𝐀
