Giimbestigahan karon sa kapulisan ang pagpamusil sa usa ka wala pa mailhing tawo sa atubangan sa Pacman Beach Resort sa Sitio As Nalang, Barangay Tinoto, Maasim, Sarangani Province, alas 10 sa buntag niadtong Oktubre 25, 2026.
Base sa inisyal nga imbestigasyon, ang suspek nga giila sa alyas nga “Pals,” 59 anyos ug caretaker sa resort, maoy mitawag sa Maasim Municipal Police Station aron ireport nga adunay tawo nga misulod sa balay nga iyang gipuy-an.
Matod sa suspek, misulay siyang pakalmahon ang maong tawo apan giatake matod pa siya, hinungdan nga mibunot siya sa iyang armas ug gipusil kini agig pagdepensa sa kaugalingon.
Narekober sa lugar ang usa ka kalibre .45 nga pistola, samtang boluntaryong misurender ang suspek ngadto sa kapulisan. Padayon pang giimbestigahan ang insidente aron mailhan ang gipusil nga tawo ug matino ang tibuok kahimtang sa pagpamusil.
