Nagpadayon ang operasyon sa MITSOM Enforcers Team sa nagkalainlaing parking area aron dakpon ang mga drayber ug operator nga molapas sa mga lagda sa transportasyon ug trapiko.
Lakip sa ilang gipunting ang mga sakyanan nga expired na ang prangkisa, walay permit o gitawag nga colorum, mga drayber nga walay lisensiya, ug mga drayber nga nagsul-ob og tsinelas, sando o mubo nga pantalon samtang nagmaneho. Apil usab sa ilang gipahigayon nga operasyon ang ubang kalapasan nga may kalabotan sa trapiko ug transportasyon.
Gipasabot nga kabahin kini sa paningkamot sa MITSOM Enforcers Team aron masiguro ang kaluwasan sa publiko, mapatuman ang patas ug legal nga operasyon sa transportasyon, ug mapadayon ang disiplina ug kahusay sa kadalanan.
Giawhag usab ang tanang drayber ug operator nga siguruhon ang pagkompleto sa gikinahanglang prangkisa ug permit, pagsunod sa hustong pamiste samtang nagmaneho, ug pagtuman sa mga balaod sa trapiko aron malikayan ang mga silot ug mapanalipdan ang kaluwasan sa tanan.
