Gikondena sa pamunuan sa usa ka simbahan sa M’lang, Cotabato ang pagpangawat sa wala mailhing mga tawo sa sudlanan sa Balaang Sakramento sulod sa ilang simbahan, nga nakahatag og dakong kasubo ug kasakit sa mga magtutuo.
Dihadiha nga gipahibalo sa obispo ang nahitabo, samtang nakigtambayayong na ang pamunuan sa simbahan sa mga otoridad alang sa lawom nga imbestigasyon ug aron matino ug mapanubag ang mga responsable sa maong insidente.
Tungod sa nahitabo, temporaryong gisuspenso ang mga misa sulod sa simbahan. Sa kasamtangan, ipahigayon ang mga misa matag Domingo sa naandan nga oras sa balay tigomanan sa simbahan hangtod adunay bag-ong pahibalo.
Ingon man, isip lakang sa paghinlo ug pagpahiuli sa pagkabalaan sa simbahan, ipahigayon ang espesyal nga seremonya sa paghinulsol ug Balaang Misa sa Oktubre 31, 2026, alas-5:00 sa hapon.
