Nadakpan ang usa ka 45-anyos nga lalaki nga mag-uuma ug residente sa lungsod sa Payao, Zamboanga Sibugay, atol sa buy-bust operation sa kapulisan sa alas 9:55 sa gabii sa Purok 4, Barangay Mount View, Payao niaging adlaw.
Gipahigayon ang operasyon sa Special Drug Enforcement Team o SDET sa Payao Municipal Police Station, kauban ang 903rd Maneuver Company sa Regional Mobile Force Battalion 9, 106th Infantry Battalion, First Provincial Mobile Force Company ug Zamboanga Sibugay Maritime Police Station. Misangpot kini sa pagkasakmit sa unom ka heat-sealed transparent plastic sachet nga adunay puti nga kristal nga substansiya nga gituohang shabu, nga may gibana-banang gibug-aton nga 0.185 gramos ug standard drug price nga nagkantidad og 1,258 pesos.
Gipahigayon ang pagmarka ug imbentaryo sa mga nasakmit nga ebidensiya atubangan sa usa ka representante sa media ug usa ka barangay kagawad sa Mount View, Payao. Gigamit usab sa mga operatiba ang alternative recording devices atol sa operasyon.
Ang dinakpan anaa na karon sa kustodiya sa Payao Municipal Police Station, samtang ang nasakmit nga gidudahang ilegal nga droga gitugyan ngadto sa Provincial Forensic Unit sa Zamboanga Sibugay Police Provincial Office alang sa qualitative ug quantitative examination.
