Opisyal nang gisugdan niadtong Oktubre 26, 2026, ang ikatulong batch sa Free Student Driver’s Licensing Program sa Provincial Capitol sa Ipil, Zamboanga Sibugay, nga nagtumong sa paghatag og libreng driving education ug tabang sa pagkuha og student permit alang sa mga Sibugaynong benepisyaryo.
Gipatuman ang maong programa pinaagi sa paningkamot ni Provincial Governor Ann K. Hofer, sa pakigtambayayong sa Land Transportation Office o LTO Ipil District Office. Tumong niini nga mahatagan og kahigayonan ang mga benepisyaryo nga makakat-on sa hustong pagmaneho ug mas masabtan ang mga balaod sa trapiko alang sa ilang kaluwasan ug sa ubang naggamit sa kadalanan.
Nahimong padayon nga programa sa probinsiya ang maong inisyatiba pinaagi sa Provincial Ordinance No. 2026-714, aron masiguro nga magpadayon ang paghatag og edukasyon bahin sa road safety ug responsableng pagmaneho. Gipadayag usab ang pagpasalamat ngadto kang Vice Governor Richard “Ric-Ric” Dy Olegario, sa mga miyembro sa Sangguniang Panlalawigan ug sa mga nagsuporta sa ordinansa.
Giawhag ang mga benepisyaryo nga gamiton ang kahigayonan aron mahimong responsable ug disiplinadong mga drayber. Gipahinumdoman usab sila nga ang pagkuha og student permit sinugdanan pa lamang sa pagkat-on, ug ang labing importante mao ang pagtuman sa mga balaod sa trapiko ug pagpanalipod sa kinabuhi sa matag naggamit sa kadalanan.
