Nakadawat og tag-20 kilos nga bugas ang 1,337 ka pamilya gikan sa upat ka barangay sa Iligan City isip ayuda sa lokal nga kagamhanan pinaagi sa Local Government Support Fund–Financial Assistance to Local Government Units o LGSF-FALGU program nga gipondohan sa Department of the Interior and Local Government ning miaging semana.
Subay sa satho sa LGU-Iligan, gilangkuban sa unang hugna sa pag-apod-apod ang 413 ka benepisyaryo sa Barangay Sta. Filomena, 191 sa Sto. Rosario, 454 sa Santiago ug 279 sa San Miguel. Gikonsidera niini, ang kahimtang sa panginabuhi sa mga benepisyaryo, gamit ang datos gikan sa Philippine Statistics Authority aron mailhan ang mga pamilyang nanginahanglan og tabang.
Gihatagan og prayoridad ang mga senior citizen, solo parent ug persons with disabilities o PWD, lakip ang mga pamilyang naapektuhan sa bagyong Basyang ug uban pang kalamidad.
Tumong sa programa nga matabangan ang mga pamilyang nanginahanglan ug makunhuran ang ilang gasto sa inadlaw nga panginahanglanon taliwala sa pagsaka sa presyo sa mga nag-unang palaliton.
