Gidakop sa Police Regional Office 12 ang lima ka indibidwal ug nasakmit ang gituohang shabu nga nagkantidad og kapin ₱30,600 atol sa lima ka operasyon batok sa ilegal nga droga sa rehiyon niadtong nakalabay nga adlaw.
Duha sa mga dinakpan ang nadakpan sa managlahing operasyon pinaagi sa search warrant sa Barangay Simsiman, Norala, South Cotabato, diin nasakmit ang gituohang shabu nga nagkantidad og kapin ₱17,500.
Sa Polomolok, South Cotabato, usa ka suspek ang nadakpan sa buy-bust operation ug nakuha ang ilegal nga droga ug ₱500 nga buy-bust money.
Usa pa ang gidakop sa Bagumbayan, Sultan Kudarat, diin nasakmit ang shabu ug usa ka kalibre .45 nga pistola nga adunay lima ka bala. Samtang, sa General Santos City, usa ka indibidwal ang gidakop human nadakpan sa mga security personnel sa Golden State College tungod sa gikatahong pagpangawat sa water meter. Narekober usab sa suspek ang duha ka pakete sa gituohang shabu.
Sumala kang PRO 12 Regional Director PBGEN Alan B. Manibog, ipadayon sa kapulisan ang kampanya batok sa ilegal nga droga pinaagi sa mga operasyong nakabase sa impormasyon ug pakigtambayayong sa komunidad.
Photo courtesy: Fandom
