Tulo ka giingong street-level drug personalities ang nadakpan sa managlahing operasyon batok sa ilegal nga droga nga gihimo sa Norala ug Polomolok, South Cotabato niadtong Oktubre 24, 2026.
Sa Norala, duha ka search warrant ang gipatuman sa Barangay Simsiman nga miresulta sa pagkadakop sa duha ka suspek ug pagkasakmit sa walo ka pakete sa gituohang shabu nga motimbang og 2.58 gramos, nga nagkantidad og 17 mil 544 pesos.
Samtang sa Purok Tinio, Barangay Poblacion sa Polomolok, nadakpan usab sa buy-bust operation si Mark Anthony Gayumani y Gallego, alyas “Tonton.” Nasakmit gikan kaniya ang tulo ka pakete sa gituohang shabu nga motimbang og 0.48 gramos, nga nagkantidad og 3 mil 292 pesos ug 80 sentimos, lakip ang 500 pesos nga buy-bust money ug uban pang ebidensiya.
Sa kinatibuk-an, mokabat sa 3.06 gramos nga gituohang shabu nga nagkantidad og 20 mil 836 pesos ug 80 sentimos ang nasakmit sa maong mga operasyon. Ipadala ang nakuhang ebidensiya sa South Cotabato Provincial Forensic Unit alang sa laboratory examination, samtang giandam na ang tukmang mga kaso batok sa mga dinakpan tungod sa giingong paglapas sa Republic Act 9165 o Comprehensive Dangerous Drugs Act of 2002.
Photo courtesy: SCPPO
