Miabot sa 88 ka indibidwal o 22 ka pamilya ang naapektuhan sa sunog nga miulbo alas 11:25 sa gabii niadtong Oktubre 25 sa Purok Islam 13-A, Barangay Dadiangas South, General Santos City.
Base sa initial report sa Bureau of Fire Protection (BFP) General Santos City, mikabat sa 23 ka estruktura ang naugdaw sa sunog, diin usa niini ang commercial space ug ang nahibilin mga residential structure.
Gibanabana sa BFP nga mikabat sa ₱1.750 milyon ang kantidad sa mga kabtangan nga nadaot sa maong insidente, sumala kang SFO1 Lester John Muñez, spokesperson sa BFP Gensan.
Gikumpirma usab sa BFP nga walay naitalang namatay o nasamdan sa sunog. Lakip sa mga nadaot ang 64 ka ukay-ukay stalls nga giabangan sa mga negosyante.
Samtang, anaa na sa kustodiya sa Police Station 6 ang usa ka persona nga giila lamang sa alyas nga “Rab,” nga giingong responsable sa pagsugod sa sunog.
Base sa inisyal nga imbestigasyon, usa ka batang babaye nga nakasaksi sa pagsugod sa sunog ang mitudlo kang alyas Rab isip posibleng responsable sa insidente. Apan, hugot nga gilimod sa suspek ang alegasyon batok kaniya.
Sa pagkakaron, anaa na sa barangay gym ang mga pamilyang naapektuhan alang sa ilang temporaryong kapuy-an. Naglihok na usab ang lokal nga panggamhanan sa General Santos City aron mahatagan og batakang panginahanglan ang mga apektadong pamilya, samtang nangita usab og paagi aron mahatagan og pinansyal nga tabang ang mga negosyanteng nawad-an og panginabuhian tungod sa sunog.
Nagpadayon ang imbestigasyon sa mga otoridad aron matino ang hinungdan sa sunog ug ang tibook detalye niini.
