Giawhag ni JCINSP Jonathan Arawangsa, warden sa Dipolog City District Jail–Male Dormitory, ang publiko nga mosuporta sa livelihood program sa mga Persons Deprived of Liberty o PDL pinaagi sa pagpalit sa ilang mga produkto.
Sa pakighinabi sa Juander Radyo Dipolog, gibutyag ni Arawangsa nga adunay bakery ang maong pasilidad isip kabahin sa livelihood program nga nagtumong sa paghatag og kahigayonan sa mga PDL nga makakat-on og bag-ong kahanas ug makapanginabuhi.
Giawhag niya ang publiko nga suportahan ang ilang mga produkto aron makatabang sa pagpalambo sa abilidad sa mga PDL ug sa ilang paningkamot nga makatampo sa panginahanglan sa ilang mga pamilya. Gipasalig usab niya nga luwas ug dekalidad ang mga produkto sa bakery tungod kay kompleto kini sa mga permit ug uban pang gikinahanglang dokumento.
Samtang, anaa na usab ang mga parol nga hinimo sa mga PDL alang sa umaabot nga panahon sa Pasko. Ang mga interesado mahimong mo-order o mo-request og disenyo sumala sa ilang gusto, sa barato nga presyo.
Gipasiugda ni Arawangsa nga dako og ikatabang ang suporta sa publiko aron mahatagan ang mga PDL og dugang kahigayonan sa pagpalambo sa ilang kahanas, pag-andam sa ilang kaugalingon alang sa pagbalik sa komunidad ug paghatag og kalipay sa ilang mga pamilya panahon sa Pasko.
Ang mga gustong mopalit sa ilang mga produkto o mo-order og parol mahimong mobisita sa Dipolog City District Jail–Male Dormitory nga nahimutang sa Barangay Dicayas, Dipolog City.
