Boluntaryong mitahan ang duha ka kanhing myembro sa New People’s Army (NPA) sa sabakan sa gobyerno niadtong Oktubre 26 sa Sarangani Province, kauban sa ilang pagsurender ang ilang mga armas ug bala natigayon sa buhatan sa 603rd Infantry Brigade Barangay Milbuk, Palimbang, Sultan Kudarat.
Giila sa mga alyas nga “JM,” 20 anyos, ug “Arpak” o “Trigo,” 24 anyos. Ug parehong residente sa Sarangani Province. Sumala sa report, nakadesisyon sila nga mobiya sa armadong pakigbisog tungod sa kahadlok ug kalisod nga ilang nasinati human sa serye sa mga engkuwentro niadtong Septiyembre 14 ug 15, diin nasamdan usab si alyas “JM.”
Lakip sa ilang gisurrender ang usa ka M16 rifle, usa ka long magazine ug 15 ka bala nga kalibreng 5.56mm. Gidala ang duha sa 105th Infantry (Saifullah) Battalion alang sa dokumentasyon ug debriefing, samtang giproseso ug gi-inventory ang mga armas ug bala.
Matud ni Col. Manuel Leo Q. Gador, Commander sa 603rd Infantry Brigade, ang ilang boluntaryong pagtahan usa ka lakang padulong sa pagbiya sa armadong pakigbisog ug pagsugod pag-usab sa malinawon nga panginabuhi ug gawasnon.
Gidayeg usab ni Brig. Gen. Edgar L. Catu, Commander sa 6th Infantry Division ug Joint Task Force Central, ang mga tropa, lokal nga panggamhanan ug komunidad sa ilang paningkamot sa pagdasig sa mga myembro sa armadong grupo nga mubalik sa sabakan sa gobyerno.
Photo courtesy: 603rd Infantry Batallion
