Nadakpan ang usa ka 19 anyos nga lalaki sa gihimong drug buy-bust operation sa kapulisan sa Barangay Spring, Alabel, Sarangani Province, alas 1:05 sa hapon niadtong Oktubre 26, 2026.
Giila ang suspetsado sa alyas nga “Jonard,” ulitawo ug residente sa Barangay Ladol sa maong lungsod. Base sa report sa kapulisan, nadakpan ang suspetsado human giingong nakabaligya og gituohang shabu ngadto sa usa ka pulis nga nagpaka-posing buyer.
Narekober gikan sa operasyon ang usa ka sachet sa gituohang shabu nga may gibug-aton nga gibana-banang 0.5 gramos ug gibanabanang kantidad nga 3,400 pesos, lakip ang 500 pesos nga buy-bust money.
Ang maong operasyon gipahigayon sa Alabel Municipal Police Station, kauban ang nagkadaiyang drug enforcement ug intelligence units sa Sarangani Police Provincial Office, 1st SPMFC ug PDEA.
Gidala na ang suspetsado sa Alabel Municipal Police Station alang sa dokumentasyon, medical examination ug drug testing, samtang gipadala na sa PNP Regional Forensic Unit 12 sa General Santos City ang nakumpiskang ebidensya alang sa laboratory examination.
Nag-andam na usab ang kapulisan sa pagpasaka og kasong kalabot sa gituohang paglapas sa Section 5, Article II sa Republic Act 9165 o Comprehensive Dangerous Drugs Act of 2002.
Photo courtesy: PRO 12
