Nipasalig sa publiko niadtong Martes ang bag-ong gitudlo nga Ombudsman Jesus Crispin “Boying” Remulla nga iyang palawman ang imbestigasyon kalabot sa flood control corruption scandal sa higayon nga makalingkod na siya sa katungdanan.
Si Remulla, kinsa kasamtangang nag-alagad isip Justice Secretary, mihimo sa pamahayag sa dihang gipangutana bahin sa gipaabot nga aksyon kalabot sa nagpadayon nga imbestigasyon sa mga flood control projects, nunot sa iyang pagtudlo ni Presidente Ferdinand “Bongbong” Marcos Jr.
Samtang ang ICI, usa ka independenteng lawas nga gimugna ni Presidente Marcos, nirekomendar sa posibleng kaso sa graft, malversation, ug falsification batok kang kanhi Ako Bicol Representative Zaldy Co ug pipila ka mga opisyal sa Department of Public Works and Highways (DPWH) tungod sa giingong pagkalambigit nila sa P289.5-million road dike project sa daplin sa Mag-Asawang Tubig River sa Naujan, Oriental Mindoro.
Giimbestigahan usab sa Ombudsman si Commission on Audit Commissioner Mario Lipana tungod sa giingong kalambigitan niini sa mga anomalosong proyekto sa pagpugong sa baha.
Si Remulla maoy napiling bag-ong Ombudsman niadtong Martes, usa ka adlaw human gipagawas sa Judicial and Bar Council ang shortlist sa mga nominado sa maong posisyon kinsa gihulipan niya si kanhi Ombudsman Samuel Martires, kansang termino natapos niadtong Hulyo 27, ug gikatakdang moserbisyo sulod sa pito ka tuig nga termino nga wala nay reappointment.
via: Interaksyon
