Nanawagan si Senador Alan Peter Cayetano sa tanang opisyal sa gobyerno, gikan sa Kongreso hangtod sa Malacañang, nga dungan nga mo-resign ug mopahigayon og snap elections aron magbutang og bag-ong set sa mga lider.
Sumala pa ni Cayetano, nga mao kini ang paagi aron mabalik ang pagsalig sa publiko sa mga politikanhong institusyon sa nasud.
Dugang pa, ang sunod-sunod nga mga isyu sa korapsyon nga giatubang sa gobyerno, maoy nakaguba sa pundasyon sa pagtuo sa katawhan sa liderato, ug ang tinuod nga tulubagon nagkinahanglan og labaw pa sa mga pulong gikan sa mga opisyal.
Matod usab sa magbabalaod, nga walay bisan usa sa mga incumbent nga opisyal ang angay tugotan nga makadagan pag-usab. Gitawag kini ni Cayetano nga usa ka national reset button, nga magpamatuod nga ang pagserbisyo sa katawhan dili bahin sa personal nga interes kon dili sa tinuod nga pagbantay sa pagsalig sa katawhan.
Ang pamahayag ni Cayetano, nahitabo sa mga kontrobersiya sa korapsyon nga naglambigit sa daghang mga proyekto sa imprastraktura ug sayop nga paggamit sa pondo.
Walay opisyal nga tubag gikan sa Malacañang, apan pipila ka mga kaalyado sa administrasyon ang nagtawag niini nga political theater.
Photo Courtesy to:The Post
