Nabiktima sa mangingilad ang usa ka senior citizen nga taga St. Therese Village, Sudapin, Kidapawan City, sa duha ka lalaking nagpaila nga gikan sa Office of Senior Citizen Affairs sa dakbayan.
Sa pakighinabi sa Juander Radyo sa biktima nga si Diosdado Lumayno, gisaysay niini nga ayha nahitabo ang pagpangilad kaniya, nakita matod siya sa duha ka lalaki sa iyang farm sa Purok 7, Barangay Lanao niadtong September 29, nga nagpailang taga OSCA og manghatag matod pa og relief goods ug gatas sa mga senior citizens.
Niadtong Oktubre 4 adlawng Sabado, nibalik matod pa ang mga suspek kaniya aron ihatag na ang relief goods ug gatas. Gikuhaan pa ang biktima og litrato ug gipatanggal ang iyang mga alahas ug relo aron ingnon nga pobre gayud ang nahatagan og hinabang.
Gihaplasan sa suspek ang tiil sa biktima ug dakong katingala niini nga human sa paghaplas dili na siya makalihok ingon man pag-estorya, ug didto na gidala sa mga suspek ang iyang mga alahas ug relo.
Nagpaila matod pa ang mga suspek kang Lumayno nga ilang paryente hinungdan nga nisalig usab kini. Tungod sa maong panghitabo, nahimo kining leksyon kaniya ug nanawagan kini sa publiko nga dili gayud mosalig sa bisan kinsa labi na sa susamang modus.
