Seryoso nga giberipika sa Office of Civil Defense (OCD) ang taho nga adunay upat (4) ang namatay ug unom (6) ang nawala samtang padayon nga nagguba ug nag-igo ang Severe Tropical Storm Opong sa nasod.
Gikutlo ang impormasyon gikan sa National Disaster and Risk Reduction Management Council (NDRRMC), giingon sa OCD nga adunay upat (4) ang gikatahong namatay sa Bicol, samtang unom (6) usab ang gikatahong nawala sa Eastern Visayas.
Gisulti pa sa OCD nga ang epekto sa Bagyong Opong nagsugod nga nasinati Biyernes sa buntag, partikular sa Bicol ug Eastern Visayas, diin ang bagyo naglihok padulong sa MIMAROPA (Region IV-B).
Sa updated advisory sa OCD, giingon niini nga gipahayag sa weather bureau PAGASA nga napabilin sa Bagyong Opong ang iyang kusog human moagi sa Sibuyan ug Tablas Islands sa Romblon ug karon nagpadulong na sa Mindoro Island.
Katapusan nga nakita ang Bagyong Opong sa coastal waters sa Ferrol, Romblon nga adunay kusog sa hangin nga 110 km/h duol sa sentro, paghapak nga moabot sa 150 km/h, ug central pressure nga 985 hPa. Gialerto ang Tropical Cyclone Wind Signal No. 3 sa sobra lima (5) ka probinsya sa Luzon, amihanang bahin sa Aklan, ug Caluya Island sa Visayas.
Sa laing bahin, giklaro sa OCD nga ang naunang gikatahong namatay walay kalabotan sa Opong kundili sa ubang weather systems sama sa Mirasol ug Nando, sama sa naunang gitaho sa NDRRMC.
Update as of 5:00 am karong adlawa, miabot na sa 10 ka tawo. Ang gidaghanon sa mga namatay tungod sa Bagyong Opong. Matud pa ni Office of Civil Defense (OCD) Officer-in-Charge Bernardo Alejandro, ang gi-report nga namatay natala sa Bicol Region ug sa Eastern Visayas.
Maayo nilang giberipika ang pito (7) ka namatay ug siyam (9) ka nawala sa Rehiyon 8 (Eastern Visayas). Samtang sa Rehiyon 5 (Bicol Region), duna’y tulo (3) ka namatay ug usa (1) ka nawala.
Gipasalig niya nga padayon ang ilang pag-monitor ug paghatag og tabang sa mga lugar nga naapektuhan. Moabot sa 12 milyones (12,000,000) ka indibidwal ang naapektuhan ug gilauman nga mosaka pa kini nga gidaghanon.
Andam na ang ilang mga air assets (gamit sa kahanginan) nga mohatag og tabang kung duna’y mga dapit nga lisud abton tungod sa baha.
Mahinumduman nga ang Philippine Atmospheric, Geophysical and Astronomical Services Administration (PAGASA) miingon nga posibleng mogawas na sa Philippine Area of Responsibility (PAR) ang Bagyong Opong karong adlawa, Sabado, Setyembre 27.
Photo courtesy: Civil Defense PH
