Mikunhod ang business confidence sa Pilipinas sa labing ubos nga punto sulod sa upat (4) ka tuig niining ikatulo (3rd) nga quarter sa tuig. Kini tungod sa paghinay sa demand ug mga global headwinds, bisan pa man kon ang pesimismo sa konsumidor mi-arang-arang sa labing maayo nga lebel sulod sa kapin duha ka tuig tungod sa bag-ong mga income streams o tinubdan sa kita.
Base sa labing ulahing Business Expectations Survey (BES) sa Bangko Sentral ng Pilipinas (BSP), ang mga lokal nga negosyo nagpakita og mas ngitngit nga panglantaw alang sa ekonomiya sa Pilipinas sulod sa Hulyo hangtod Setyembre.
Kini makita sa kinatibuk-ang business confidence index (CI) nga 23.2 porsyento niining quarter, nga adunay pagkunhod gikan sa 28.8 porsyento sa miaging quarter. Kini ang labing ubos nga lebel sa business confidence sukad sa ikatulo nga quarter sa 2021, nga kaniadto mius-os sa lebel sa pesimismo nga -5.6 porsyento.
“Ang pag-ubos sa pagsalig nag-una tungod sa paghinay sa demand atol sa ‘ghost month’ ug sa pagsugod sa ting-ulan ug tingbagyo,” matud sa BSP sa usa ka pamahayag nga gipagawas kagahapong adlawa, Setyembre 26.
Atol sa “ghost month,” kasagaran daghang indibidwal ang nalangan sa pagdesisyon, sama sa pagsugod og negosyo, pagsulod sa partnership, o paghimo og investments.
“Ang global headwinds, sama sa mas taas nga US [United States] tariffs, geopolitical tensions, ug nihinay nga foreign demand, nakadugang usab sa kabug-at sa pagsalig sa negosyo,” dugang sa BSP.
Photo courtesy: Trading Economics
