Sa tumong mahimong mas produktibo ang mag-uuma ug andam sa pag-atubang sa mga kalisdanan sa pagpanguma gipaisugda sa Department of Science and Technology (DOST) ang Project Sarai, usa ka inisyatiba sa pinaagi sa DOST-PCAARRD ug gi-implementar sa University of the Philippines Los Baños (UPLB), aron mapalig-on ang kaalam ug kapasidad sa mga mag-uuma.
Sa esklusibong pakighinabi sa Juander Radyo Malaybalay, ngadto ni maam LOWELA V. CLOMA, Communication and Training Coordinator sa buhatan sa DOST BUKIDNON. Matud pa niini, nga dako kaayo nga hagit sa mga mag-uuma ang epekto sa climate change. Lisod para kanila ang pagtantiya kung kanus-a magsugod ug moundang ang ulan o kung kanus-a mosulod ang ting-init.
Pinaagi sa Project Sarai, gilauman nga makahatag og science-based nga datos aron mahibal-an sa mga mag-uuma ang husto nga panahon sa pagpugas, pag-ani, ug pagpangandam sa irigasyon. Dugang pa niya nga Usa usab sa gipaabot nga mahatag sa proyekto mao ang teknolohiya pinaagi sa mobile application.
Dinhi, mahimo sa mag-uuma nga picturan ang tanom nga adunay peste gamit ang ilang cellphone ug i-upload kini sa app. Sa pagkahuman, makadawat sila og tukmang tambag kung unsaon pagsugpo sa peste nga nagadaot sa ilang tinanom.
Sa Northern Mindanao, ang regional hub sa proyekto itukod dinhi sa Provincial Science and Technology Office (PSTO) Bukidnon. Ang mga pilot site kasamtangan nga giapilan mao ang Manolo Fortich, Maramag, Malaybalay City, ug Kalilangan.
Gilauman nga pinaagi sa Project Sarai, mapalig-on ang kaalam ug kapasidad sa mga mag-uuma sa Bukidnon ug tibuok rehiyon
via: DOST – Bukidnon
