Nakatala ang Korte Suprema og dili momenos sa 11,437 ka examinees sa unang adlaw sa 2025 Bar Examinations, matod sa taho nga gipagawas kagahapong adlawa sa press conference.
Matod ni Supreme Court Associate Justice Amy Lazaro-Javier, kinsa maoy Chairperson sa 2025 Bar Exams, ang kinatibuk-ang ihap sa mga nagparehistro aron mokuha sa pasulit karong tuiga gibanabana nga 13,000. Sa maong gidaghanon, kapin sa 11,000 ang aktuwal nga mitambong sa unang adlaw sa pasulit.
Base sa datos 6,673 sa mga examinees ang mga babaye, samtang 4,764 ang mga lalaki. Kini halos parehas nga ihap sa miaging tuig, diin ang mga babaye ag kasagaran nga makapasar sa Bar Examinations.
Gawas sa Unibersidad sa Santo Tomas nga nagpabiling nag-unang testing center sa Manila, gipahigayon usab ang eksaminasyon sa pipila ka piniling unibersidad sa lain-laing bahin sa nasod. Kini naglakip sa Unibersidad sa San Beda – Manila, New Era University – Quezon City, Manila Adventist College – Pasay, San Beda College – Alabang, Unibersidad sa Pilipinas – Bonifacio Global City ug uban pa.
Ang pagpalapad sa mga testing centers kabahin sa tumong sa Korte Suprema nga himoong mas accessible sa mga examinees ang Bar Exams sa tibuok nasud.
Samtang nagpadayon ang Bar Exams sa umaabot nga mga adlaw, ang Korte Suprema nagpabiling hingpit nga suportado sa tanang examinees.
via: nfph
