Nagsugod na ang Department of Energy (DOE) sa paghimo og mga guidelines aron masiguro nga ang transition sa Pilipinas ngadto sa paggamit sa nuclear energy dili makadaot sa kinaiyahan.
Gipanguluhan sa Nuclear Energy Program-Inter-Agency Committee, ang gihimo nga technical workshop aron hisgutan ang mga environmental requirements alang sa mga nuclear power plant projects.
Sumala ni DOE Legal Services Director Myra Fiera Roa, tumong sa komite mao ang pag-ila sa papel sa matag ahensya sa gobyerno nga mo-regulate sa nuclear energy, lakip na ang Environmental Impact System checklist alang sa mga conventional plant ug small modular reactors.
Gipasiugda sa DENR nga mahinungdanon kaayo ang usa ka lig-on nga regulatory framework, aron masiguro ang kaluwasan gikan sa planning hangtod sa operasyon sa mga nuclear power plant.
Sa dili pa ipatuman ang mga proyekto, kinahanglan una makakuha og mga dokumento sama sa License to Operate gikan sa Philippine Nuclear Research Institute, Certificate of Endorsement gikan sa DOE, ug Environmental Clearance Certificate gikan sa DENR.
Photo courtesy of Department of Energy Philippines
