Gipahayag sa Bureau of Customs nga ilang subling imbestigahan bisan ang mga paryente sa pamilya Discaya mahitungod sa mga ‘luxury cars’ nga may kalabotan sa isyu sa flood control projects. Sumala ni Customs Commissioner Ariel Nepomuceno, kabahin kini sa halapad nga imbestigasyon nga ginahimo sa buhatan.
Diin, kauban usab nila ang Land Transportation Office aron makakuha og impormasyon bahin sa mga sakyanan nga nakapangalan sa mga kontraktor ug ilang mga paryente nga apil sa kontrobersiya. Apan ipasabot niini nga dili lang ang pamilya Discaya ang pokus sa imbestigasyon o gireport nga adunay gibuhat nga ilegal may kalabotan sa tag-iya sa giingong kapin 80 ka mga ‘luxury cars’.
Matod pa niini, kabahin lamang kini sa mas gipalapdan nga pag-imbestiga mahitungod sa isyu sa ‘flood control projects. Buot lamang matud pa sa buhatan nga masuta ang kamatuoran kung tinuod ba nga gikan sa income sa maanomaliyang proyekto ang gigamit nga pagpamalit sa mga sakyanan.
Tungod niini, gipahayag pa sa commissioner nga dili usab nila pasagdan nga imbestigahan ang uban pang klase sa mahalong sakyanan. Tutukan usab matud pa nila kung adunay mga kabtangan nga ilegal nga napasulod sa nasud.
Photo courtesy to: news grant hilario
