Nalipay ang Department of Information and Communications Technology (DICT) sa pagkapasar ug pagka-aproba sa balaod nga ‘’Konektadong Pinoy Act. Awtomatik nga nahimong hingpit nga balaod ang maong Konektadong Pinoy Act niining milabay nga mga adlaw, nga gikalipay ug dako sa maong ahensya.
Tumong sa maong bag-ong balaod mao ang pagsiguro nga ang matag Pilipino adunay kasaligan nga internet. Matod ni DICT Secretary Henry Rhoel Aguda, nga dili lang kini kabahin sa pagtukod og mga networks, apan usa usab kini ka paagi aron mahatagan og dugang oportunidad ang publiko.
Tungod niini, iyang gipahibalo nga magpatawag sila og meeting uban sa mga stakeholders, aron buhaton ang draft sa Implementing Rules and Regulations (IRR) nga kinahanglang mahuman sulod sa 90 ka adlaw.
Dugang pa ni Secretary Aguda, pinaagi sa maong balaod, gilauman nga makab-ot ang mas nindot nga kalidad sa edukasyon, kalamboan sa e-commerce, maayong serbisyo sa gobyerno, ug pagpauswag sa mga komunidad.
Photo courtesy of ibctv13.com
