Patay ang usa ka giingong miyembro sa New People’s Army (NPA) atol sa engkwentro tali sa militar ug rebeldeng grupo sa Barangay Bandara Ingod, Amai Manabilang, Lanao del Sur.
Nalambigit sa engkwentro ang mga tropa sa 16th Scout Ranger Company ubos sa 103rd Infantry Brigade, nga nakig-engkwentro batok sa mga miyembro sa Platun Uno, Sub Regional Committee 5 (SRC-5), ilawom sa North Central Mindanao Regional Committee (NCMRC) sa NPA.
Gikumpirma sa militar nga patay ang usa sa mga rebelde ug nakumpiska ang usa ka M16 rifle.
Gikataho usab walay casualty sa parte sa gobyerno.
Nagpadayon karon ang pursuit ug scouring operations aron masundan ang mga posibleng dalan sa pag-atras sa grupo, samtang gibutyag usab nga ang ubang yunit sa militar alerto na alang sa dugang nga lihok sa mga rebelde.
Sa laing bahin, usa pa ka engkwentro ang nahitabo niadtong Agosto 22, 2025 sa Barangay Pagonayan, diin usa ka babayeng rebelde ang misurender.
Matod sa 1st Infantry Division (1ID), kini nga mga insidente kabahin sa ika-siyam nga engkwentro batok sa SRC-5 karong tuiga, nga misangpot na sa pagsurender sa pito ka miyembro ug pagkaluya sa ilang pwersa.
Gipadayag ni Brigadier General Billy Dela Rosa, Commander sa 103rd Infantry Brigade, nga ang padayon nga presyur sa militar ug suporta sa komunidad maoy nakapaduol sa hingpit nga kapakyasan sa grupo.
Photo courtesy of GMANEWSTV
