Abli na ang voter registration sa Commission on Elections o COMELEC sugod karong adlawa Nobyembre 10, 2026, alang sa mga gustong makabotar sa 2028 National and Local Elections. Magpadayon ang pagdawat sa mga aplikasyon hangtod Hulyo 30, 2027.
Sa pakighinabi sa Juander Radyo Dipolog Newsteam ngadto sa Dipolog COMELEC pinaagi ni Atty. Florencio Saministrado Jr., Election Officer, gipahibalo niini nga abli ang ilang opisina gikan Martes hangtod Biyernes, alas 8:00 sa buntag hangtod alas 6:00 sa gabii. Samtang alas 8:00 sa buntag hangtod alas 5:00 sa hapon ang oras sa serbisyo matag Sabado ug holidays, kon adunay gitakdang satellite registration. Usa niini ang registration site nga nahimutang sa Lee Plaza.
Dili lamang first-time voter registration ang ilang dawaton, lakip usab ang Transfer of Registration Record, reactivation, pag-usab sa personal nga impormasyon, ingon man ang pag-update sa records sa mga senior citizen, Persons with Disabilities o PWD, Indigenous Peoples ug uban pang vulnerable sectors.
Gipahinumdoman usab sa COMELEC ang mga aplikante nga dili dawaton isip balidong identification document alang sa voter registration ang Barangay ID o Certification, Community Tax Certificate o Cedula, PNP Clearance ug Company ID. Busa, gikinahanglan nga magdala ang mga aplikante og tukmang balidong ID nga gidawat sa COMELEC sama sa sa philsys ID ug uban pa.
Giawhag sa COMELEC ang publiko nga magparehistro o mag-update sa ilang records sa comelec aron masiguro ang ilang kahigayunan nga makabotar sa umaabot nga piniliay sa 2028.
