Nakumpiska sa mga otoridad ang mokabat sa 408 ka master cases sa nagkalainlaing klase sa gidudahang smuggled cigarettes nga gibanabanang nagkantidad og 25 milyon pesos atol sa operasyon sa Barangay Poblacion, Salug, Zamboanga del Norte, niadtong nakalabay nga adlaw.
Gipahigayon ang operasyon sa CIDG Zamboanga del Norte Provincial Field Unit, kauban ang Special Operations Team sa CIDG Regional Field Unit 9, Regional Mobile Force Battalion 9, Zamboanga del Norte Provincial Mobile Force Company ug lokal nga kapulisan.
Matud sa CIDG, posibleng pasakaan og kaso ang mga tag-iya sa nakumpiskang kontrabando nga padayun pang gipangita tungod sa paglapas sa Republic Act 12022 o Anti-Agricultural Economic Sabotage Act, Republic Act 10643 o Graphic Health Warnings Law, ug Republic Act 10863 o Customs Modernization and Tariff Act.
Gipasiugda sa CIDG nga ang maong mga balaod nagtumong sa pagsumpo sa dinagkong pagpamaligya ug pagsulod sa ilegal nga produkto, pagpanalipod sa panglawas sa publiko, pagsiguro sa hustong pagbayad sa buhis ug pagpanalipod sa lehitimong negosyo ug ekonomiya sa nasud.
Gipasalig sa ahensya nga ipadayon nila ang kampanya batok sa smuggling ug uban pang ilegal nga kalihokan sa tibuok nasud.
Photo courtesy: PNP Criminal Investigation and Detection Group
