Dakpan ang usa ka 45 anyos nga lalaki nga giila nga Top 1 Most Wanted Person sa city level ug Top 6 sa provincial level atol sa gipahigayong joint law enforcement operation sa Barangay Ilaya, Dapitan City, niadtong Nobyembre 7, 2026.
Ang pasikop pinasikad sa warrant of arrest tungod sa kasong Lascivious Conduct nga may kalabotan sa Section 5(b) sa Republic Act 7610 o Special Protection of Children Against Abuse, Exploitation and Discrimination Act. Ang warrant giisyu sa Municipal Trial Court, Branch 4, Dapitan City, nga adunay girekomendar nga piyansa nga P120,000.
Gipangunahan ang operasyon sa mga personahe sa Dapitan City Police Station, uban sa Regional Intelligence Division 9, 901st Maneuver Company sa RMFB9 ug Mabuhay SBC 5th Special Operations Unit sa Marine Group, nga miresulta sa pagkasikop sa akusado.
Gidala gilayon ang dinakpan sa Dapitan City Police Station alang sa tukmang disposisyon ug dugang nga legal nga proseso.
𝐏𝐡𝐨𝐭𝐨 𝐂𝐨𝐮𝐫𝐭𝐞𝐬𝐲: 𝐙𝐍𝐏𝐏𝐎
