Gi-turnover na ang ₱12 milyones nga Super Health Center didto sa Barangay Laligan, Valencia City niaging Oktubre 26, 2026, nga gitumong sa pagpaduol sa mga batakang serbisyo medikal ngadto sa mga residente, ilabina kadtong mga nagpuyo sa lagyo nga dapit.
Personal nga gitambongan ang maong seremonya ni Senador Christopher “Bong” Go, uban sa pag-abiabi sa mga lokal nga opisyal sa siyudad sa pagpanguna ni City Mayor Amie Galario ug Punong Barangay Jose Magallanes Jr.
Sa iyang mensahe sa programa gipasabot sa Senador nga ang maong pasilidad usa ka medium-type polyclinic nga makahatag og mga checkup, laboratory tests, ug pag-atiman alang sa mga minor nga sakit, lakip na ang pag-atiman sa mga mabdos aron dili na kinahanglang mobiyahe pa ngadto sa sentro sa dakbayan.
Taliwala sa maong kalihokan, mipadayag og dakong pagpasalamat ang mga lokal nga lider sa siyudad sa padayong suporta sa senador sa pagpalambo sa serbisyong panglawas, diin gihulagway sa kapitan ang proyekto isip usa ka natuman nga damgo sa ilang komunidad.
Samtang diha sa programa, gipasiugda usab ni Go ang iyang padayong pagpakigbisog alang sa Magna Carta sa mga Barangay Health Workers (BHW) ug ang pagpauswag sa uban pang mga pasilidad sama sa Malasakit Center ug Regional Specialty Centers.
Photo courtesy: LGU – Valencia City
