Posibleng ipatawag sa Quasi-Judicial Committee sa Sangguniang Panlungsod sa Dakbayan sa Malaybalay ang walo ka mga kapitan sa barangay nonot sa nakuhang mga reklamo gikan sa mga kontraktor bahin sa gikatahong pagpangayo og 10 porsiyentong komisyon.
Gipadayag ni Konsehal Jason Chad Ayala, chairman sa maong komitiba sa pakighinabi sa Juander Radyo Malaybalay nga kasamtangan nang ginasusi sa iyang opisina ang mga dokumento ug ebidensya nga gipasa sa mga nagreklamo aron maklaro ang isyu.
Gipatin-aw usab ni Ayala nga dili pa niya direktang hukman ang maong mga kapitan samtang wala pa nadungog ang ilang bahin ug wala pa nakompleto ang opisyal nga imbestigasyon. Giplano na sa komitiba ang pagpadala og pormal nga pahibalo o summons ngadto sa mga hingtungdang opisyal aron makahatag sila og tubag ug makakuha og ilang abogado.
Dugang pa niini, gipahinumdoman sa konsehal nga adunay mga limitasyon sa pagdungog og mga kasong administratibo sulod sa 90 ka adlaw sa dili pa ang eleksyon, busa unahon usab sa komitiba ang paghan-ay sa mga naunang kaso samtang giawhag ang ubang may ebidensya sa pagsumite niini sa hustong pamaagi.
