Gipabalhin ngadto sa evacuation center ang 14 ka pamilya nga gilangkoban sa 74 ka tawo gikan sa Purok 2-A, Barangay Bunawan Proper, Davao City, human maabot sa Code Red ang lebel sa tubig sa suba.
Sumala sa report nga nadawat alas 11:56 sa gabii niadtong Oktubre 13, 2026, nagpasilong ang mga residente sa Bunawan Gym ug gihatagan og init nga pagkaon samtang luwas silang nagpabilin didto.
Nagpadayon ang pagbantay sa lebel sa tubig, samtang andam ang mga rescue personnel ug sakyanan sa barangay sa pagresponde kon adunay emerhensiya.
Gipahimangnoan ang mga lumulupyo sa mga lugar nga kanunayng maapektuhan sa baha nga magmatngon ug motuman sa mga pahimangno sa mga otoridad aron malikayan ang peligro.
Photo courtesy: DCPO
