Duha ang patay human mibangga ang motorsiklo nga giingong nalambigit sa drag race sa usa ka sikad alas 8:25 sa gabii niadtong Oktobre 13 sa Digos-Makar Road, Purok 5, Barangay Katangawan, General Santos City. Lakip sa namatay ang usa ka 70-anyos nga lolo nga si Ernesto, contruction worker nga pasahero sa sikad ug ang 18-anyos nga estudyante nga si alyas Jayboy nga nagmaneho sa motorsiklo.
Sumala sa inisyal nga imbestigasyon sa Traffic Enforcement Unit sa Gensan, padulong sa sentrong bahin sa syudad ang duha ka sakyanan gikan sa Barangay Tinagacan dihang misulay og liko ang sikad apan nabanggaan kini sa motorsiklo nga nagdagan sa maong dalan.
Gikatahong nag-waswasanay o drag race ang mga motorsiklo ug nakita pa ang estudyante nga nagmaneho sa istilong “Superman” sa wala pa ang banggaan.
Tungod sa kusog nga impact, nalagpot ang mga sakay sa sikad ug nakaangkon og grabeng samad ang duha ka biktima nga miresulta sa ilang kamatayon.
Ang ubang pasahero sa sikad nga naangol gidala sa Dr. Jorge P. Royeca City Hospital alang sa pagpatambal. Padayon ang imbestigasyon sa kapulisan aron matino ang tibuok sirkumstansya sa aksidente.
