Gipahigayon bag-ohay lang dinhi sa dakbayan sa Cagayan de Oro ang Archdiocesan Launching sa Dapat Isa Lang Movement nga nagtumong sa pagputol sa political dynasty sa nasud. Pinaagi sa Archdiocese of Cagayan de Oro Social Action Center ug Archdiocesan Good Governance Apostolate (AGGAP) uban sa Iglesia Filipina Independiente gipasiugda ang kamahinungdanon sa pagduso og balaud nga tinud-anay nga moluwat sa paghari sa pipila lamang ka pamilya sa panggobyerno.
Pagpasabot ni Retired Associate Justice Antonio Carpio, lead convenor sa Dapat Isa Lang Movement nga kasamtangan, gunit sa mga dinastiya ang 75% sa pwesto sa Senado, 83% sa House of Representatives, 87% sa mga Provincial Governor, ug 75% sa mga City Mayor.
Tungod niini, matud pa sa grupo, nababagan ang maayong serbisyo publiko, lisod manubag ang naa sa pwesto, ug walay kahigayonan ang mga bag-ong lider nga makasulod. Busa giduso nila kini nga people’s movement nga nagtumong nga makakalap og pirma nga anaa sa 8.5 million kon 10% sa rehistradong botante ug daugon ang referendum aron nga makamugna og balaud pinaagi sa people’s initiative nga dili na muagi sa Kongreso.
Sa gisugyot nga balaodnon adunay lima ka importanteng probisyon: Una, sakop hangtod sa first cousin o fourth degree of consanguinity. Ikaduha, “Dapat Isa Lang” – isa ra ka miyembro sa pamilya ang pwede modagan sa national level ug isa ra sa local level sulod sa samang probinsya.
Ikatulo, kinahanglan adunay one-term cooling-off period, bawal ang sunod-sunod nga pagpulipuli sa paryente sa samang pwesto. Giduso usab nila ang mekanismo sa pagsulbad sa conflict sa kandidatura ug ang katungod sa bisan kinsang botante nga mag-file og petisyon batok sa malapas niini.
